‫الرئيسية‬ تقنية هل المحتوى التعليمى مفيد ؟
تقنية - 26 مارس، 2019

هل المحتوى التعليمى مفيد ؟

أكيد أول ما بدأت فى مجال الـContent لقيت الناس بتتخانق!

ناس بتقول المحتوى التعليمي دا هو أفضل شئ ممكن تعمله، وناس تانية بتقول المحتوى التعليمي دا بيضيع وقت ومجهود ومبيحققش نتايج فى الأخر.

خليني أقولك فى سطر واحد كدا، المحتوى التعليمي بيحقق نتايج وبيبيع، لو إتعمل صح.
عايز تعرف إزاى؟…إدينى من وقتك دقيقتين بتركيز.

الـموضوع دا بيجاوب على 4 أسئلة مهمين:
1-إيه فايدة المحتوى التعليمى؟
2-إمتى ممكن أقدم محتوى تعليمي؟
3-إزاى أقدم محتوى تعليمي يخلينى أبيع فى الأخر؟
4-أشكال المحتوى التعليمي دا؟

يلا بينا،،

1-
تخيل كدا إنك قررت تفتح مشروع، وفى خلال الفترة اللى إنت بتبدأ فيها عرفت إن فيه شخص متميز جداً فى ريادة الأعمال وعنده خبرات سابقة كبيرة ناجحة، ولحسن الحظ وإنت رايح تقعد فى كافية لقيت الشخص دا قدامك وقابلته للمرة الأولى، وجاتلك الفرصة إنك تقعد تتكلم معاه 5 دقايق بس، وسألته عن حاجة ليها علاقة بمجال خبرته وإتكلم معاك ونصحك بدون مقابل، وقالك لو إحتاجت حاجة إبعتلى.

بعد ما نصحك روحت ذاكرت الكتاب اللى نصحك بيه وطبقت الكلام اللى هو قاله وبدأت تشوف نتايج فعلاً، هتحس بإيه تجاه الشخص دا؟
أكيد هتحس إنه شخص موثوق فيه، وهترشحه بعد كدا لأكثر من حد عشان يتعلم منه، ولو عمل أى Event أو Course أو كتاب بفلوس إنت تقدر تتحمل تكلفتها، أكيد هتروح على طول وترشح كمان ناس معاك.

المحتوى التعليمي اللى الشخص دا قدمهولك فى مقابلة فى 5 دقايق، أو فى بوست على فيسبوك، أو فى فيديو على youtube أو فى event for free عملوا الاَتى:
-زود ال Trust أو الثقة في إن الشخص دا فاهم كويس فى اللى هو بيعمله.
-هتحس بالإمتنان لإن الشخص دا أفادك من غير ما يطلب منك أى شئ، بالعكس دا إدالك من وقته ومجهوده اللى ممكن يستفيد بيهم فى أى شئ تانى فى شغله أو في حياته.
-هترشحه للناس لو حسيت إنه إستفاد فعلاً من اللى هو قدمهولك.
-وبعيداً عنه بقى شوية، ممكن نصيحته ليك، تكون عالجت عندك مشكلة حقيقة، وهى إنك مثلاً مكنتش عارف إنك بتخسر بس عشان فيه تكاليف معينة فى تأسيس المشروع إنت مكنتش حاسبها وبالتالى دا بيخليك تخسر فى الأخر- يعنى هو هنا عملك Awareness بمشكلة معينة موجودة عندك- ودا يخلينا نروح لإجاية السؤال التانى.

2-
المحتوى التعليمي للأسف أصبح موضة، أغلب الناس اللى بتروح تعمل محتوى تعليمي بتروح تعمله عشان شافت إن حد تانى عمله ونجح، بغض النظر هل دا هينفع معايا ولا لا؟

طيب أعرف منين؟
-لازم أدرس السوق بتاعى كويس وأشوف المنافسين الموجودين فى السوق هل بيقدموا محتوى تعليمي؟ ولو هما فعلاً بيقدموا محتوى تعليمي، يا ترى بيقدموه عن إيه بظبط؟ وبيقدموه فى أى شكل؟
لما أعمل دا هقدر ألاقى فرصة فى تجهيز محتوى تعليمي قيم، أقدر أميز نفسى بيه عن باقى المنافسين، وأقدر أعرف إيه الحاجة اللى محدش بيتكلم فيها عشان أقدر أغطيها.

-لازم أكون فاهم الفئة اللى انا مستهدفها دى، أو الشخص اللى هيشترى منى دا هل بياخد وقت كبير عشان ياخد قرار إنه يشترى؟ ولا المنتج بتاعى مش محتاج وقت وقرار؟
مثلاً: لو انا ببيع عقار أو عربية، دى حاجة بدفع فيها فلوس كتير ومش هعملها كل يوم، عشان كدا قرار العميل فى الشراء بياخد وقت طويل، على العكس لو رايح أشترى قلم جديد مثلاً، أو لو رايح أشترى Notebook، فهختار واحدة لونها حلو مثلاً بعد ما أتفرج عليها عند الراجل أو عشان عاملين branding بطريقة مختلفة على ال social media.

-مهم جداً إنى أكون Aware بالResources اللى عندى هل انا عندى القدرة إنى أقدم محتوى تعليمي بشكل مستمر وثابت، ولا هييجى عليا وقت هيبقى عندى ضغط شغل ومش هقدر أعمل دا؟ ممكن يكون عندى تيم كبير من 9 أشخاص فيهم حد متخصص فى الجزء دا بس وقادر يقدمه بشكل مستمر، وممكن يبقى عندى في تيم ال Marketing كله 2 بس، فمقدرش أحملهم مهة زى دى، لإن الAudience لو عودته على حاجة، أو لو وعدته بحاجة لازم تلترزم بيها.

3-
لازم أكون فاهم يعنى إيه Buyers journey، وإن الشخص قبل ما يشترى بيمر بمراحل مختلفة، لازم أفهمها كويس بشكل عام، وأطبق المفهوم بشكل عملى وواقعى على المنتج أو الخدمة اللى انا بقدمها وأربطها بال Funnel بتاعى، وبالمنتج اللى انا هبيعه فى الأخر.
يعنى ببساطة لازم أحدد الأسئلة اللى موجودة عند ال customer فى المراحل دى، وأكتب محتوى يرد على الأسئلة دى فى كل مرحلة.

المراحل دى هى Awareness، Consideration, Decision.

مثال:
-فى مرحلة الAwareness مثلاُ الCustomer مش عارف يوصف المشكلة بتاعته بالشكل الصحيح، دور المحتوى التعليمي هنا إنى أخليه يعرف إيه المشكلة بظبط وتوصيفها الصحيح؟
فلو انا شغال فى مجال العقارات محتاج أرد على سؤال إيه أفضل للإستثمار؟ هل إن الشخص يشترى عقار ولا إنه يحط فلوسه فى البنك؟ -لو إفترضنا إنى هنا بكلم اللى عايز يستثمر فلوسه – المفروض هنا إنى أنتج محتوى يرد على الأسئلة دى.

-فى مرحلة الConsideration، الشخص عرف إن الأفضل إنه يستثمر فى العقار،
هنا محتاج أقوله بقى أنهى أفضل إختيار ليه هل إنه يستثمر فى أرض ولا عقار؟ شقق تجارى ولا سكنى؟ حسب إمكانياته ومدة الإستثمار؟..هنا المحتوى اللى هقدمه لازم يرد على الأسئلة دى!

-فى مرحلة الDecision هنفترض إنه إختار يستثمر فى الأراضى، محتاج أعرضلة الأسعار والإختيارات المختلفة وأديله Call to Action إنه يشترى.

هنا دا ممكن يكمون كتالوج للأراضى دي ومميزات كل حجة ليهم.

لو إنت مش رابط بقى أول مرحلة بالمنتج، يبقى كأنك معملتش أى حاجة، هنا يبقى المحتوى التعليمى ملهوش لازمة، إحنا إتفقنا إن إنت بتعمل دا عشان فى الأخر تبيع، ود امش عيب!

4-
لو جينا نتكلم عن أشكال المحتوى التعليمي هتلاقي إن المحتوى دا ممكن تقدمه فى شكل Video أو Audio أو E-book أو Catalogue أو Blog، وغيره..

هتقدر تعرف تستخدم أنهى نوع لما تعمل الخطوات اللى فوق دى، يعنى لما تدرس السوق وتشوف مين بيقدم إيه؟
وتعرف ال Audience بتوعك بيفضلوا إيه بظبط؟
وتشوف هما فى أنهى مرحلة عشان تقدر تقر هتقدملهم إيه؟

ملخص الكلام اللى فوق دا كله بقى، إنه لازم يكون عندك strategy وكل حاجة بتتحرك تحتها، مينفعش تبقى بتعمل حاجات كتير وكل حاجة ماشية في سكة مختلفة، إتعلم صح ونفذ صح.

لو عايز تتعلم أكثر، يبقى:
من هنا:contentmarketinginstitute.com
أو من هنا:Academy.hubspot.com

أتمنى الPiece of content دي تكون ساعدتك تفكر بشكل مختلف زى ما إحنا متعودين، وياريت توصل الكلام دا لأى حدد ممكن يستفيد بيه.

اترك تعليقاً

لن يتم نشر عنوان بريدك الإلكتروني.