Home مجتمع نصيحة لوجه الله
مجتمع - 31 January، 2019

نصيحة لوجه الله

نصيحة لوجه الله !!! ..
أى واحد عايش فى مصر لازم يكون عامل
#توكيل_عام_قضايا لأى محام يثق فيه !!.. سواء كان قريبه أو صديقه أو جاره أو محامى يسمع عنه إنه محترم أو ما إلى ذلك .. مفيش حاجة إسمها أن أبوك أو أخوك يحل محلك أمام الجهات الرسمية !! ..

المهم تعمل توكيل القضايا ده وتحتفظ حتى به فى بيتك #للطوارئ !!! .. حتى ولو كنت محامى !!! ..
ايوه زى ما سمعت للطوارئ !!! ..

لأن ببساطة ممكن حضرتك تفاجأ فى كمين وأنت مسافر مثلاً بصدور حكم غيابى ضدك ولا تعلم عنه شئ !! ..
فقد يكون فعلاً هذا الحكم خاص بك وقد يكون تشابه أسماء !!! ..

عموماً فى هذه الحالة ها يتحفظوا على حضرتك لحين ترحيلك للتنفيذ الصادر منه الحكم (وأنت ورزقك فى بعد مكان التنفيذ عن المكان اللى اتقبض على حضرتك فيه !!!) لكى تقرر الطعن بالمعارضة !!! .. أما لو كنت عامل توكيل قضايا .. فببساطة ها تتصل بمحاميك وتمليه رقم حصر الحبس أو الغرامة مع رقم القضية وهو هايقدر بسرعة يقرر بدلا منك بالمعارضة بصفته وكيل عنك ويرسل لك شهادة دليلاً على المعارضة وبها ميعاد الجلسة كمان !!! .. أو سيحضر لك تحريات المباحث بأن المعنى بالحكم الظاهر على الكمبيوتر هو شخص أخر وليس أنت !!!! .. وهاتمشى بدون بهدلة فى عريبة الترحيلات والحمد لله ..

الموقف التانى وده سبب تنبيهى لحضراتكم بهذا البوست .. وهو أنك تكون متهم فى موضوع وليكن مثلاً إخفاء أشياء مسروقة !! لاقدر الله (يعنى حرامية لما الشرطة قبضت عليها .. ادعت أنها باعت لك ذهب مسروق !!!) .. والمباحث قامت قبضت عليك فى محلك واتعرضت محبوس على النيابة اللى قررت حبسك لحين ورود تحريات المباحث .. اللى لو جت تلك التحريات بأنك كنت تعلم بأن ما اشتريته كان من متحصلات سرقة وبإنك عميل مع الحرامية !!! .. فستضطر النيابة العامة لإحالتك لمحاكمة جنائية .. لتفاجأ بحكم من القاضى بحبسك مع الشغل والنفاذ (يعنى بدون كفالة) وتستأنف من داخل محبسك فيعدل القاضى الحكم مثلاً ويقضى بكام شهر مع النفاذ أيضاً .. وتضطر تحضر من محبسك قبل ترحيلك لتقرر بالنقض لأن مش معاك توكيل لمحام ولازم علشان تودع أسباب النقض تستنى الحكم لما يتكتب حيثياته من المسودة !!! وعلشان تعمل استشكال بوقف تنفيذ عقوبة الحبس لحين الفصل فى النقض !!! .. ووسط الدوامة دى تلاقى أن الإشكال لازم يتعمل بتوكيل قضايا !!! .. وتظل تلهث دون جدوى !!! .. حتى لو كنت كمحام حاضر جلسات محاكمته !!! ..
لازم توكيل يا سيد يا محترم !!! ..

أخيراً ستستسلم للتعليمات وغصب عنك ها تقدم طلب للمحام العام الذى بدوره سيخاطب القسم لتمكين المتهم المحبوس بعمل توكيل للمحامى !!! ..
ودوخينى يا لمونة من النيابة لإستجواب المحبوس بقسم الشرطة ثم خطاب من القسم إلى الشهر العقارى ثم التوجه إلى الإدارة العامة للتوثيق للموافقة ثم العودة للشهر العقارى وتسيب رقم موبايلك علشان تأخد دور عقبال ما يحن عليك موثق ينتقل على حسابك ويروح القسم للمحبوس علشان يعمل التوكيل !!! زى اللى فى الصورة دى !!! .. ويكون ميعاد جلسة الإشكال عدت والحمد الله .. وتضطر تنتظر ميعاد أخر !!! وأنت محبوس !!! .. عادى جداً خليك ايزى !! ..

وللأسف الشديد هذا هو بالفعل ما حدث مع حد محترم ومظلوم للأسف ، وأهله وأنا كمحامى دوخنا السبع دوخات عقبال ما نعرف نخلى المحبوس يعمل توكيل قضايا !!!! ..
وغير مواقف كتير جداً بتبقى فى أشد الحاجة لتوكيل محامى !!! .. وتندم لإنك ما عملتهوش وأنت حر طليق !!! ..
صدقنى التوكيل بيفيد الموكل وليس المحامى !!!! ..

إعمل توكيل لمحام قريبك أو صاحبك أو جارك أو أى محام محترم تثق فيه وخليه فى بيتك إحتياطى للطوارئ .. وربنا يستر ..

Leave a Reply

Your email address will not be published.