Home خواطر واشعار النهاية – بقلم : أمير أباظة
خواطر واشعار - 5 February، 2019

النهاية – بقلم : أمير أباظة

أنا إتهديت .
ومش فاضل غير يا دوب طوبة
لا تنفع ضهر ، ولا مَسنَد
لا تنفع ساس ، ولا تَصلُح ، لـ غير الضرب
أنا إللي فـ حَرب ، وكل الناس تشوفني سلام
بداري وَجعي في الأَيام .
وأشيل أَحزاني فـِ إيديا .
وبهرب م الزمان لـ زمان
وبلقيَّ الشعر فـ عنيا ،،
أشُوف الفَرحة تصويرة
وأدوق الحلو تصبيرة
وبشرب م الحياة بيرة ،
ومتأثرش ..
بحاول إني يوم مأخسرش
وبخسر يومي في مُحوَّلات
عرفت إن الحياة جولات
وشُوفت من البشر خولات
ماعُدتش بقرا مِ الصفحات غير العنواين
ومين سابني ، وصاحب مين
ومين طيِّب وجوا العين
ومين من مين يحطوا فـ مين
شتمت الشِعر فَـ شتمني ..
وقالي ؛ يا عرص ما تذاكر
مفكّر إن وجعك حلو ؟!
لأ شاطر ..
بخاطر باللي باقيلي
يدوب ضحكة فـ صورة زمان ، وأنا صغيَّر
هروبي لـ حصة نحو / أو تَعبير عشان أكتب
وجدول ضرب مأحفظهوش
وجدول تاني يضربني ..
وبجري لـ بنت تشربني ..
وناس بتخاف تقربلي عشان شكلي مَهُوش هوا
دا كلي شروخ .. ولكّن فاضي من جوا
بحب الصِدر والسِوَّة .. وبكره شَعر بين رجلين
يا حُب إسألي توب الشِعر راح على فين !
سفالة وحك \ حبة عك \ غِيرة ، وشَك ، ونميمة
يا حَبة شُعرا بِلَا قيمة ..
لعبتوا الشِعر تقسيمة ،، ومأكسبتوش
وطبلة ، وزفة على قافية
يا أنصاف شُعرَا بالعافية
في منكم نيِّتُه صافية ..
ودا قليل ..
وباقي الشُعرا .. يا ممُّوحن .. يا متنيل
دا عود الشِعر كَان ليّن ، وماستحملش
أكَمّل ، ولَّا مأَكّملش ..
هسيب الختمة لـ خيالكم
هسيب الحُكم لـ عيالكم .
أكيد الغلطة فـ أجيالكم مَهيش فـ الشِعر
هسيب القِمّة للشُعرَا ،، وهروح للقعر
في سكة مُحن مش هكتب ..
دا مشوار صعب \ هستسهل ..
هقول الوسِط لو شغال في رقاصة .. فـ لازمة طبول
وأقوُل العيب مهوش في القُول
ما ياما كتبنا فـ المعقول ، وقالوا الفرق فـ الَهزّة
هسيب الشعر فـ البِزّة . وهرضَّع مُر
رضّعت العُمر فَطمونُي ” فَـ مُت حزين ”
دا آخر نَص مِن وَجعَي يَا عَم الليل
هطبل ليكوا بس بـ شَرط سهل أخير
فجاوبوني \ وهبقىَّ علية.
طَالما العِيب فـ تُوب الشِعر
لِبِستوه ليه ؟!

#النهاية
#أمير_أباظة

Leave a Reply

Your email address will not be published.